مش عارف يا مصر
بَحِب فيكِ إيه
مع إني مابحبش
أقول باشا وبيه
ولا باعرف اشتري
فيكِ حاجة بجنيه
لكن قلبي
بيسمعك دايماً
بتناديه
جايز بَحِب نيلك
والمجاري بِتْصُب فيه
ولَّا قُطنِك
اللي بِنْدَوَّر عليه
مش عارف يا مصر
بَحِب فيكِ إيه
.............
يمكن لأني بَحِب
شوارعك ودروبك
بَأقدر أسامحك
على كل ذنوبك
يِمكن لأني
حاسس إني بِدونك
كأنك خلعتي
عنك كُل هدومك
.............
مش عارف يامصر
أنا اللي عَوَجْتك
ولَّا أنا اللي
هاعدِلِك
ولَا عارف إنتِ
بَهْدِلْتيني
ولَّا أنا مِبَهْدِلِك
كل ما احاول أبعد عنك
ما أقدرش أَبَدِّلِك ...
بَاتْغَرَّبْ بِعيد
وأجري عليكِ أَحِنِّلِك
..............
جايز حَبِّيت فيكِ
بناتك وِوْلَادِك
جايز عِشقت
مساجدك وكنايسك
وِسَهْل عليَّ
وَصْفِك ورسمك
على أّدْ ما انتِ بعيدة
عني
بَاحِس إني لامسك
وقريب مِنِّك
وسامع ألمك وهمسك ..
...........
قوليلي يا أحلى
سنين عمري ودنيتي
يا جنة الله
ف ارضُه وكنيتي
يانوري الوحيد
الباقي ف ظلمتي
عايزاني ارجع
ولا اخليني ف غُربتي
ليست هناك تعليقات:
إرسال تعليق