بعيدا عن السياسة : محمد صديقي .

محمد صاحبي دايما يقولي : انت عارف أنا بحب أخد رأيك في كل حاجة قبل ما أعملها ، وفي كل مرة يفعل العكس تماما ، وبرغم أنه كل مرة يخسر إلا أنه لم يكف عن هذه العادة حتى الآن ، هذه المرة الأخيرة قالي عايز أشوفك ضروري ، ولما قابلته قال : انت عارف اني عندي عمارة كبيرة ورثتها من زمان وبرغم أن فيها تلاتين شقة وفي موقع ممتاز لكن عدد الشقق المؤجرة ست شقق فقط وطبعا دخل العمارة لا يكفيني أنا وأولادي خاصة بعد غلاء الأسعار وبفكر في أولادي من بعدي هيعملوا إيه ؟! علشان كده بفكر أقترض من البنك بضمان العمارة وأشتري أرض في مكان تاني وأبنيها وأبيعها وأشتغل في تجارة العقار ، ايه رأيك ؟! قلت له : يا محمد زي ما بتقول العمارة في موقع ممتاز وعندك شقق خالية ، شوف الأول أسباب عدم الإيجار إيه وحل المشكلة أفضل من الإقتراض خاصة أن سوق العقار به ركود الآن والسيولة لدى الناس قلت كتير وممكن لاقدر الله لو لم توفق تخسر أيضا العمارة التي ورثتها . قال : العمارة محتاجة صيانة للدهانات وشبكة الصرف قديمة ومحتاجة مصاريف لدخول الكهرباء والميه للشقق وبعض التشطيبات . قلت له : والله يا محمد أمرك غريب جدا ، يعني انت مش قادر توفر مبلغ بسيط جدا تحيي بيه أصل فتقرر تقترض علشان تخلق أصل جديد !! مبدأ لا أعتقد أنك لو سألت أي حد ممكن يتفق معاك . قال: بصراحة أنا خجلان أن والدي ورثني عمارة لوحدي وأنا نفسي أورث أولادي كلهم على الأقل عمارة . قلت له : دي مجازفة وبدون زعل أخشى انك لن تورثهم إلا الديون . قال منهيا الحديث : عموما متشكر ، أنا هتوكل على الله وإن شاء الله خير أنت عارفني راسي ناشفة وبحب المغامرة . قلت له : ربنا يعين أولادك .