عدا الخميس

أول خميس
 كانت الدموع ع الخد
ثاني خميس
 اختلط الهزل بالجد
ثالث خميس
 بقى هزل بجد
من رابع لآخر
 خميس انعد
عدا الخميس
والجمعة وبكره الحد
بان الكحل
 وأحمر الخد
راح الأب وقبله
الزوج والجد
طريق الدموع
 سد في سد
الحياة أبدى من ميت
 ومن أي حد
حد يقولي
إيه قيمة الإنسان
غني.. فقير
 مهما كان
إيه الفرق بينه
 وبين حيوان
ديل طويل قصير
وزيه لسان
وشحم ولحم..
 كلها سيان
ذكرى جميلة أليمة
 طي النسيان
ندم وحسرة
بعد فوات الاوان
نفتكر ..
ياريت اللي كان ماكان
مفيش مانع
 من دمعة كمان
ياعيني
 دا كان إنسان
ييجي الخميس
 ويقام الحد
يعيدوا حكايته
 من مهد ل لحد
ينفض المكان
 من حد وحد
يبان الكحل
والأحمر ع الخد
ينفض المكان
 من حد وحد